തിരുവനന്തപുരം ജില്ലാ മെഡിക്കല് ഓഫീസ് മുഖാന്തിരമാണ് ക്രമീകരണങ്ങള് ഏര്പ്പെടുത്തിയിട്ടുള്ളത്. രാവിലെ 7 മണി മുതല് രാത്രി 10 മണി വരെ ആറ്റുകാല് ക്ഷേത്ര സന്നിധിയില് ഡോക്ടര്, സ്റ്റാഫ് നഴ്സ്, നഴ്സിംഗ് അസിസ്റ്റന്റ്, ആംബുലന്സ് എന്നിവ ഉള്പ്പെടെ മുഴുവൻ മെഡിക്കല് ടീമിന്റെ സേവനം ലഭ്യമാക്കിയിട്ടുണ്ട്. കുത്തിയോട്ടത്തിലെ കുട്ടികളുടെ ആരോഗ്യ പരിചരണത്തിനായി രണ്ട് വിതം പീഡിയാട്രീഷ്യന്മാരുടേയും, സ്റ്റാഫ് നഴ്സുമാരുടേയും മുഴുവന് സമയ സേവനം ലഭ്യമാക്കിയിട്ടുണ്ട്. ഇതുകൂടാതെ ആയുഷ് വിഭാഗങ്ങളുടെ സേവനങ്ങളും ലഭ്യമാക്കിയിട്ടുണ്ട്.
ആറ്റുകാല് പൊങ്കാലയോടനുബന്ധിച്ച് പൊതുജനാരോഗ്യ പ്രവര്ത്തനങ്ങളുടെ മേല്നോട്ടം വഹിക്കുന്നതിന് ഹെല്ത്ത് ഇന്സ്പെക്ടര്മാര് ഉള്പ്പെട്ട 8 പേരുടെ സേവനം ലഭ്യമാക്കിയിട്ടുണ്ട് . പൊങ്കാലയുമായി ബന്ധപ്പെട്ട് എന്തെങ്കിലും അടിയന്തിര സാഹചര്യമുണ്ടായാല് നേരിടുന്നതിന് നഗര പരിധിയിലെ സര്ക്കാര്, സ്വകാര്യ ആശുപത്രികളിലും മെഡിക്കല് കോളേജിലും ആവശ്യമായ സജ്ജീകരണങ്ങള് ക്രമീകരിക്കുന്നതിന് നിര്ദ്ദേശം നല്കിയിട്ടുണ്ട്.
ആരോഗ്യ വകുപ്പ്, കനിവ് 108, കോര്പറേഷന്, ഐഎംഎ, സ്വകാര്യ ആശുപത്രികള്, ഫയര് ഫോഴ്സ് എന്നിവിടങ്ങളില് നിന്നുള്ള 35 ആംബുലന്സുകള് സജ്ജമാക്കിയിട്ടുണ്ട്. കൂടുതല് ആബുലന്സുകളിലും ഡോക്ടര്മാര് ഉള്പ്പെടയുള്ളവരുടെ സേവനം ലഭ്യമാക്കിയിട്ടമുണ്ട്.
