വാങ്ങാനുള്ള ചെലവ് കാരണം കഞ്ചാവ് ചെടി നട്ടുവളർത്തി, വളര്‍ന്നുപൊങ്ങിയത് പത്തടി ഉയരത്തില്‍,
കൊട്ടാരക്കര: വീട്ടില്‍ കഞ്ചാവ് ചെടി നട്ടുവളര്‍ത്തിയ സ്ത്രീ അറസ്‌റ്റില്‍. കൊട്ടാരക്കര താലൂക്കില്‍ മേലില വില്ലേജില്‍ കണിയാന്‍കുഴി കാരാണിയില്‍ തുളസിയാണ് എക്‌സൈസ് വകുപ്പ് അറസ്റ്റ് ചെയ്തത്.
തുളസി, കഞ്ചാവ് ഉപയോഗിക്കുകയും വില്‍ക്കുകയും ചെയ്യുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിലാണ് ഉദ്യോഗസ്ഥര്‍ ഇവിടെ പരിശോധന നടത്തിയത്. തുടര്‍ന്ന് ഇവരുടെ വീട്ടുമുറ്റത്ത് നിന്ന് 10 അടി ഉയരവും 61 ശിഖരത്തോടും കൂടിയ വിളവെടുക്കാന്‍ പാകമായ കഞ്ചാവ് ചെടി കണ്ടെടുക്കുകയായിരുന്നു. കഞ്ചാവ് വാങ്ങുന്നതിന് കൂടുതല്‍ ചിലവ് വരുന്ന സാഹചര്യത്തിലാണ് നട്ടുവളര്‍ത്താന്‍ തന്നെ തീരുമാനിച്ചതെന്ന് തുളസി പറഞ്ഞു.
എക്‌സൈസ് സര്‍ക്കിള്‍ ഇന്‍സ്‌പെക്‌ടര്‍ സഹദുള്ള പി.എയുടെ നേതൃത്വത്തില്‍ നടത്തിയ റെയ്‌ഡില്‍ പ്രിവന്റീവ് ഓഫീസര്‍ ഷിലു .എ, സിവില്‍ എക്‌സൈസ് ഓഫീസര്‍മാരായ നഹാസ്.റ്റി, സുനില്‍ ജോസ്, വനിതാ സിവില്‍ എക്‌സൈസ് ഓഫീസര്‍ ജിഷ, എക്‌സൈസ് ഓഫീസര്‍ മുബിന്‍ എന്നിവര്‍ ചേർന്ന് പരിശോധന നടത്തി തുളസിയെ അറസ്റ്റു ചെയ്തു.
