കോഴിക്കോട്: പ്രസവ ശസ്ത്രക്രിയക്കിടെ വയറ്റിൽ കത്രിക കുടുങ്ങിയ സംഭവത്തിലെ പരാതിക്കാരി അടിവാരം സ്വദേശിനി ഹർഷീന (32) ഗവ. മെഡിക്കൽകോളജ് ആശുപത്രിക്ക് മുമ്പിൽ സത്യഗ്രഹ സമരം തുടങ്ങി. സംഭവം സംബസിച്ച മൂന്നാമത്തെ അന്വേഷണറിപ്പോർട്ടും പുറത്തു വരാത്ത സാഹചര്യത്തിലാണ് ഈ തീരുമാനം. ഇന്നു രാവിലെ മുതൽ ഹർഷീന കുടുംബാംഗങ്ങൾക്കൊപ്പം സമരം തുടങ്ങിയിരിക്കുകയാണ്. ആരോഗ്യമന്ത്രിയും സർക്കാരും കൈവിട്ട സഹാചര്യത്തിലാണ് നീതികിട്ടുംവരെ മെഡിക്കൽകോളജിന് മുമ്പിൽ സമരത്തിന് വരുന്നതെന്ന് ഹർഷീന പറഞ്ഞു.
ഇനി അനുഭവിക്കാനായി ഒന്നുമില്ല. മൂന്നുകുട്ടികളുടെ അമ്മയാണ് താൻ. ഭർത്താവിന് കൂലിപ്പണി. കഴിഞ്ഞ അഞ്ചുർഷത്തിനിടെ ചികിത്സയ്ക്കായി ചെലവായത് ലക്ഷങ്ങളാണ്. വീടും സ്ഥലവും വരെ പണയം വെക്കേണ്ടിവന്നു. കോഴിക്കോട് മെഡിക്കൽകോളജിൽ ഡോക്ടർമാർക്ക് സംഭവിച്ച കൈയ്യബദ്ധമാണ് തന്നെ ഈ നിലയിലാക്കിയത്. എന്നിട്ടും സർക്കാരും ആരോഗ്യവകുപ്പും ഇതുവരെ തിരിഞ്ഞ് നോക്കുന്നില്ല. രണ്ട് അന്വേഷണ കമ്മീഷനെവെച്ചു. അത് തൃപ്തികരമല്ലെന്ന് കണ്ടപ്പോൾ ആരോഗ്യമന്ത്രി നേരിട്ട് വിളിച്ച് ആരോഗ്യവകുപ്പ് അഡീഷണൽ ചീഫ് സെക്രട്ടറിയുടെ മേൽനോട്ടത്തിൽ ഒരു അന്വേഷണകമ്മീഷനെക്കൂടി നിയിച്ചു. ഇപ്പോൾ മൂന്നുമാസമാകുന്നു. തന്നിൽനിന്നു ഒരു തെളിവെടുപ്പുപോലും നടത്തിയിട്ടില്ല. ഇനി ആരെയാണ് വിശ്വസിക്കേണ്ടത്. തങ്ങൾക്കിനി മറ്റ് മാർഗമൊന്നുമില്ല. അതുകൊണ്ടാണ് നീതി ലഭിക്കുംവരെ സമരവുമായി ഇറങ്ങിയത്.'- ഹർഷീന പറയുന്നു.
പ്രസവാനന്തരം ഹർഷീനയുടെ വയറ്റിൽ കുടുങ്ങിയ കത്രിക (ആർട്ടറിഫോർസെപ്സ്) 2022 സെപ്തംബർ 17നാണ് മെഡിക്കൽകോളജിലെ ശസ്ത്രക്രിയക്കിടെ പുറത്തെടുക്കുകയുണ്ടായത് . സംഭവം വിവാദമായപ്പോൾ മെഡിക്കൽകോളജിന്റെ അന്വേഷണസംഘം രംഗത്തെത്തി. ആ അന്വേഷണത്തെ ഹർഷീന തള്ളിയപ്പോൾ ആരോഗ്യവകുപ്പിന്റെ ആന്വേഷണം 2022 ഒക്ടോബർ 21ന് പ്രഖ്യാപിച്ചു. ഈ അന്വേഷണ സംഘം ഹർഷീനയ്ക്ക് അനുകൂലമായി റിപ്പോർട്ട് നൽകുകയുണ്ടായി. പക്ഷെ മൂന്നുമാസം കഴിഞ്ഞിട്ടും ആരോഗ്യവകുപ്പ് അന്വഷണ റിപ്പോർട്ട് പുറത്ത് വിട്ടിട്ടില്ല . ഇതിനിടെ ഹർഷീന വീണ്ടും ആശുപത്രിയിലായി. തുടർന്ന് ഹർഷീനയുടെ ദുരിതം വാർത്തയായപ്പോൾ ആരോഗ്യവകുപ്പ് അഡീഷണൽ ചീഫ് സെക്രട്ടറിയുടെ മേൽനോട്ടത്തിൽ മന്ത്രി അന്വേഷണം പ്രഖ്യാപിച്ചു. എന്നാൽ മൂന്നു മാസമാകുമ്പോഴും യാതൊരു നടപടിയുമുണ്ടാകാത്ത സാഹചര്യത്തിലാണ് സത്യഗ്രഹ സമരംആരംഭിച്ചിരിക്കുന്നത്.
