ഇഷ്ടത്തിലായ കാമുകനോടൊപ്പം പോകാന്‍ കാറില്‍ കയറിയപ്പോള്‍ ഫോട്ടോയില്‍ കണ്ടയാളല്ല, വ്യാജ ഫോട്ടോയിലൂടെ സൗഹൃദം സ്ഥാപിച്ച്‌ പതിനേഴ്കാരിയെ തട്ടിക്കൊണ്ട് പോയ യുവാവ് പിടിയില്‍,
കിളിമാനൂര്‍: സോഷ്യല്‍ മീഡിയയില്‍ വ്യാജ പ്രൊഫൈല്‍ ഉണ്ടാക്കി ഫോട്ടോ പ്രദര്‍ശിപ്പിച്ച്‌ സൗഹൃദം സ്ഥാപിച്ച്‌ പതിനേഴുകാരിയെ തട്ടിക്കൊണ്ടുപോയ പ്രതി പിടിയിലായി.
പുളിമാത്ത് മണ്ണാര്‍ക്കോണം ലാല്‍ ഭവനില്‍ ശ്യാമിനെയാണ് (32) കിളിമാനൂര്‍ പൊലീസ് അറസ്റ്റ് ചെയ്തത്.
ഇക്കഴിഞ്ഞ 5ന് രാവിലെ 10നാണ് കേസിനാസ്പദമായ സംഭവം. സോഷ്യല്‍ മീഡിയയില്‍ വ്യാജമായി ഫോട്ടോ കാണിച്ച് സൗഹൃദം സ്ഥാപിച്ച പ്രതി പെണ്‍കുട്ടിയെ ഫോണില്‍ വിളിച്ചുവരുത്തി കാറില്‍ കയറ്റി തട്ടിക്കൊണ്ടു പോവുകയായിരുന്നു. എന്നാല്‍ സോഷ്യല്‍ മീഡിയയില്‍ പരിചയപ്പെട്ട ആള്‍ ഇതല്ലെന്ന് മനസിലാക്കിയ പെണ്‍കുട്ടി, കാറില്‍ വച്ച്‌ തന്നെ ബഹളമുണ്ടാക്കിയതോടെ ഇയാള്‍ ഭീഷണിപ്പെടുത്തി കുട്ടിയുടെ ഫോണ്‍ പിടിച്ചു വാങ്ങിയ ശേഷം . കുട്ടിയെ വെഞ്ഞാറമൂട് ഭാഗത്ത് ഇറക്കിവിടുകയായിരുന്നു.
സംഭവത്തിന് ശേഷം പെണ്‍കുട്ടിയും രക്ഷിതാക്കളും കിളിമാനൂര്‍ പൊലീസ് സ്റ്റേഷനിലെത്തി പരാതി നല്‍ക്കുകയായിരുന്നു. തുടര്‍ന്ന് നടത്തിയ അന്വേഷണത്തിലാണ് ശ്യാം അറസ്റ്റിലായത്. റൂറല്‍ ജില്ലാ പൊലീസ് മേധാവി ഡോ.ദിവ്യ.വി.ഗോപിനാഥിന്റെ നിര്‍ദ്ദേശപ്രകാരം ആറ്റിങ്ങല്‍ ഡി.വൈ.എസ്.പി ഡി.സുനീഷ് ബാബുവിന്റെ നേതൃത്വത്തില്‍ കിളിമാനൂര്‍ ഐ.എസ്.എച്ച്‌.ഒ എസ്.സനൂജ്, എസ്.ഐമാരായ വിജിത്ത് കെ.നായര്‍, സത്യദാസ്, സി.പി.ഒമാരായ സജീദ് ശ്രീരാജ്, മഹേഷ്,ഷിജു,സജന,ഗായത്രി എന്നിവരാണ് അന്വേഷണ സംഘത്തിലുണ്ടായിരുന്നത്. പിന്നീട് പ്രതിയെ കോടതി റിമാൻഡ് ചെയ്യുകയായിരുന്നു.
